Kryeministri i Kosovës, Albin Kurti përmes një postimi në Facebook, ka kujtuar 10-vjetorin e sulmit me eksploziv te “Tre Rrokaqiejt” në veri të Mitrovicës që ndodhi në banesën e familjes Haradinaj e ku mbeti i vrarë Selver Haradinaj dhe u plagosë gruaja dhe dy fëmijët e tij.
Kurti ka thënë se do të kërkojnë e do të angazhohen për drejtësi. Ai ka theksuar se autoritetet e prokurorisë dhe policisë e kanë mbështetjen që të veprojnë për zbulimin dhe kapjen drejt gjykimit dhe dënimit të fajtorëve.
Sipas tij , edhe pse kanë kaluar 10 vite, fajtorët ende nuk dihen.
Siç thotë i pari i Qeverisë, ky sulm mund të ketë qenë edhe për prapavija etnike dhe mund të jetë kryer nga strukturat ilegale dhe kriminale të Serbisë , trashëgimi e zgjatur e pasluftës nga regjimi gjenocidal i Millosheviqit.
“Sot ne e kujtojmë me dhimbje e pikëllim Selver Haradinajn, dhe kërkojmë e angazhohemi për drejtësi. Përmes drejtësisë dhe dënimit të kriminelëve Kosovën do ta bëjmë vend demokratik e prosperues ku të gjithë qytetarët jetojnë e punojnë të sigurt pavarësisht përkatësisë kombëtare e fetare, gjinore e sociale”, ka shkruar Kurti.
Kujtojmë se ky sulm kishte shqetësuar dukshëm banorët e Kosovës, e sidomos disa shqiptarë që jetojnë në veri të Kosovës.