Një avion ushtarak rus është rrëzuar në gadishullin e pushtuar ukrainas të Krimesë, duke shkaktuar vdekjen e 29 personave në bord, njoftoi Ministria ruse e Mbrojtjes.
Mbetjet e avionit të tipit An-26 u gjetën të martën pasi aeroplani humbi kontaktin me autoritetet gjatë një “fluturimi rutinë”, sipas ministrisë.
Autoritetet ruse fajësuan një “defekt teknik” për aksidentin dhe raportuan se nuk kishte dëmtime të jashtme në avion, duke lënë të kuptohet se nuk dyshohet për raketa, dronë apo faktorë të tjerë të jashtëm, shkruan BBC, transmeton Dukagjini.
Në bord ndodheshin shtatë anëtarë të ekuipazhit dhe 23 pasagjerë, ndërsa avioni po fluturonte mbi gadishullin e Krimesë, të cilin Rusia e aneksoi në mënyrë të paligjshme në vitin 2014.
Komiteti Hetimor i Rusisë konfirmoi rrëzimin dhe njoftoi se ka nisur një hetim për shkelje të sigurisë së fluturimit.
Agjencia e lajmeve Tass raportoi se kontakti me avionin humbi rreth orës 18:00 sipas kohës lokale, ndërsa mbetjet u gjetën pas një operacioni kërkim-shpëtimi.
Ukraina nuk ka reaguar ende për këtë ngjarje.
Avioni An-26 është një mjet ajror i epokës sovjetike, i përdorur kryesisht për qëllime ushtarake për transport të ngarkesave të rënda dhe një numri të vogël pasagjerësh në distanca të shkurtra dhe të mesme. Ai prodhohet nga kompania ukrainase e hapësirës ajrore Antonov.
Këta avionë përdoren që nga fundi i viteve 1960 dhe kanë qenë të përfshirë në disa aksidente fatale ndër vite.
Në vitin 2020, 26 persona, kryesisht kadetë, humbën jetën kur një An-26 ukrainas u rrëzua në Kharkiv. Një vit më pas, 28 persona vdiqën në një aksident në Lindjen e Largët të Rusisë, ndërsa në vitin 2022 një person humbi jetën në një rrëzim në rajonin e Zaporizhias në Ukrainë.