Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, ka prezantuar rezolutën e cila do të propozohet nga AAK për votim në Kuvendin e Kosovës, e që ka të bëjë me kërkesën për interpelancë me ministrin e Financave, Hekuran Murati në lidhje me mosekzekutimin e pagave për mësimdhënësit.
“Ndalja e presionit dhe cenimi i të drejtave të punëtorëve në administratën shtetërore dhe ndërhyrjeve në kompetencat dhe autonominë e komunave. Ekzekutimi i pagave, nisja e dialogut me partnerët socialë në gjetjen e zgjidhjes për kërkesat e punëtorëve përmes shtesave dhe Ligjit për Pagat”, ka shkruar Tahiri në Facebook.
Ndër të tjera, Tahiri ka thënë se Grupi Parlamentar i AAK-së kërkon që të ndalet diskriminimi i mësimdhënësve dhe maltretimi i fëmijëve e prindërve.
“Krizat dhe jostabiliteti nuk i duhet askujt! Sot, të dalin pagat dhe të vazhdojë normaliteti në vend”, ka vijuar ai.
