Kreu i Lidhjes Demokratike të Kosovës, Lumir Abdixhiku së bashku me nënkryetarin e LDK-së, Lutfi Haziri kanë pritur në darkë pune të gjithë udhëheqësit partiak dhe liderët institucional të shqiptarëve të Luginës.
Së bashku me kryetarin e PVD-së dhe deputetin, z.Shaip Kamberi, kryetarin e Alternativës për Ndryshim dhe kryetarin e Komunës së Preshevës, z.Shqiprim Arifi, kryetarin e PD-së dhe kryetarin e Komunës së Bujanocit, z.Nagip Arifi, kryetarin e Këshillit Kombëtar Shqiptar, z.Ragmi Mustafi, kryesuesin e Kuvendit Komunal në Preshevë, z.Sami Salihu, kryetarin e LPD-së z.Shqiprim Musliu, kryetarin e AFEDS, z.Muharrem Salihu dhe kryetarin e VATRA-s, z.Kushtrim Kadriu biseduam mbi gjendjen e shqiptarëve në Preshevë, Bujanoc e Medvegjë”, thuhet në njoftimin e Abdixhikut në Facebook.
Kreu i LDK-së shtoi se nga ky takim, kanë dalur dhe me apel të përbashkët për të gjithë shqiptarët që jetojnë në Luginë, Kosovë e Mërgatë që të marrin pjesë në procesin e regjistrimit të popullsisë në tre komunat shqiptare.
“Regjistrimi masiv është përgjigje ndaj diskriminimit strukturor ndaj shqiptarëve të Luginës, siç dhe është kontribut patriotik në avancimin e të drejtave autoktone të shqiptarëve të Luginës”.
Mes tjerash, Lumir Abdixhiku tha se do të angazhohen për të drejtat politike dhe civile të shqiptarëve të kësaj ane.