Zëvendëskryeministri Besnik Bislimi, ka qenë pjesë e tryezës së diskutimit “Agjenda Evropiane 2022”, e cili u mbajt në bashkëpunim me Ambasadorin e Gjermanisë, Jörn Rohde, Ambasadorin e Republikës së Çekisë, Pavel Bilek, përfaqësues të zyrës së BE-së në Kosovë, anëtarë të komisionit parlamentar për Integrim Evropian dhe pjesëmarrës nga shoqëria civile.
Gjatë këtij diskutimi Bislimi ka vlerësuar punën dhe të arriturat e Kosovës që raporti i KE-së ju jep theks të veçantë. Ai më tej ka shtuar se raporti i fundit është ndër më të mirët me të cilin Kosova është nderuar ndonjëherë.
“Raporti për vendin 2022 i Komisionit Evropian, është ndër më të mirët ndonjëherë për Kosovën dhe ndër më të mirët në rajonin e Ballkanit Perëndimor”, ka shkruar Bislimi.
Tutje zëvendëskryeministri, përmes një reagimi në rrjetin social Facebook ka thënë se raporti e vlerëson punën e qeverisë dhe stabilitetin politik, megjithatë sipas tij ky raport për herë të parë është konservativ për ndërhyrjet politike në institucionet publike.
“Për herë të parë, raporti për vendin është konservativ për ndërhyrjet politike, pra nuk ka vlerësim ku thuhet që ka ndërhyrje apo vullnet për ndërhyrje politike në institucionet publike”, është shprehur Bislimi.
Gjithashtu Bislimi ka vlerësuar sundimin e ligjit, luftimin e korrupsionit dhe krimit të organizuar, dhe ka shtuar se këto duhet të jenë dy fusha në të cilat duhet të vlerësohemi për maturitetin evropian.
Vlen të theksohet, që zëvendëskryeministri Bislimi ka thënë se Qeveria për një vit ka zgjidhur probleme të cilat kanë ekzistuar për vite me radhë por, që kanë qenë kërkesa të BE-së.
“Në 1 vit, Qeveria i ka dhënë zgjidhje problemeve që kanë ekzistuar për vite me rradhë dhe që kanë qenë kërkesa të vetë BE. Terminali doganor, ligji per financimin e partive politike, racionalizimi i agjensive janë vetëm disa prej shembujve të shumta”, ka thënë zëvendëskryeministri Bislimi.