Ambasadori i Shteteve të Bashkuara të Amerikës në Kosovë, Jeffrey M. Hovenier, është pritur në takim nga Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi.
Zyra e Kryeministrit ka bërë të ditur se në takim është riafirmuar partneriteti i ngushtë në mes Kosovës dhe Shteteve të Bashkuara të Amerikës, gjersa theksohet se u diskutua mbi procesin e dialogut të fasilituar nga BE dhe rrugën përpara si një vazhdimësi e vizitës së Escobar.
“Kosova vazhdon të mbetet palë aktive, me ide në proces, konstruktive, me vullnetin, gatishmërinë dhe përkushtimin për arritjen e një marrëveshjeje ligjërisht të obligueshme, për normalizim të plotë të marrëdhënieve, me njohjen reciproke në qendër”, thuhet në njoftim.
Para pak ditësh, emisari amerikan, Gabriel Escobar, ka vizituar Kosovën me ç’rast është takuar edhe me presidenten e vendit, të mërkurën.
Ai ka thënë se me presidenten Osmani, kanë diskutuar për disa modele e opsione për themelimin e Asociacionit të Komunave me Shumicë Serbe, gjithmonë sipas tij, në përputhje me Kushtetutën e Kosovës.