Kryeministri i Kosovës, Albin Kurti, bashkë me zëvendëskryeministrin e parë, Besnik Bislimi dhe Shefin e Stafit të Kryeministrit, Luan Dalipi, ka pritur në takim ambasadorët e vendeve të QUINT-it dhe përfaqësuesin e Zyrës së Bashkimit Evropian në Kosovë.
Përgjatë takimit është diskutuar për zhvillimet në vend, procesin e dialogut ndërmjet Kosovës dhe Serbisë dhe për çështjet aktuale, sipas njoftimit nga Zyra e Kryeministrit me theks te energjia dhe vendimi i Qeverisë për targat të veturave.
Po ashtu, sipas njoftimit nga Zyra e Kryeministrit, në lidhje me temën e dialogut Kosovë-Serbi, është diskutuar për elementet e ndryshme në kornizën themelore të marrëveshjes së ardhshme për të cilën Kurti ka thënë që duhet ta sjellë normalizimin e plotë me njohjen reciproke në qendër.
Po ashtu, në njoftim thuhet se gjatë takimit energjia kishte vëmendje të veçantë.
Kurti i ka njoftuar ambasadorët për masat e qeverisë në ndihmë të qytetarëve dhe si përgjigje ndaj krizës energjetike që ka kapluar të gjithë kontinentin e Evropës.
Po ashtu, ai ka folur për rëndësinë e zbatimit të plotë dhe të shpejtë të udhërrëfyesit për energji, ndaj të cilit dakordim Republika e Kosovës dhe institucionet vartëse kanë treguar përgjegjshmëri të lartë duke përmbushur obligimet tona në kohë rekord.
Ndërkaq, në lidhje me vendimin për targa, ai ka thënë se nuk është i drejtuar kundër serbëve të Kosovës.
“Nëpërmjet tij dhe me ftesën tonë të hapur për të konvertuar targat e tyre në ato legale dhe zyrtare, edhe po respektojmë sundimin e ligjit edhe po u japim lehtësime financiare”, u shpreh Kurti.