Presidenti i Serbisë, Aleksander Vuçiq, të enjten në Këshillin Kombëtar për Siguri ka komentuar rreth riregjistrimit të targave të qytetarëve serbë në Kosovë.
Ai tha se “serbët në Kosovë do t’i rezistojnë paqësisht autoriteteve të Kosovës”.
Vuçiq bëri të ditur se u ka thënë shteteve të QUINT-it dhe BE-së se kanë mashtruar që Kosova ka të drejtë për veprimet e saja në lidhje me riregjistrimin.
“Para disa ditëve mora një demarsh nga përfaqësuesit e vendeve të QUINT-it dhe të BE-së. Në atë akt, në pikën dy thuhet se veprimi i Kosovës është legjitim, por problemi është në kohën dhe metodat. Ata nuk kanë të drejtë të bëjnë këtë, sipas asnjë marrëveshjeje. Ata shpikën gjithçka. U thash se po mashtronin publikun, ua theksova dhe nuk u interesuan. Ata mund të jenë arrogantë”, ka thënë ai, raporton Danas.
Sipas Vuçiq, “ajo që po flet QUINT-i, BE-ja dhe Kosova nuk ekziston askund”.
Vuçiq u dërgoi mesazh serbëve të Kosovës duke lënë të nënkuptohet se do të jetë me ta në kohë të vështira.
“Mesazhi për serbët në Kosovë është se ne nuk jemi me ta për të qenë kur është e lehtë dhe për të vënë parulla nëpër lokale, por edhe kur është e vështirë”.
Vuçiq tregoi se ka dëgjuar kërkesat që kanë qytetarët serbë në Kosovë.
“Ata na informuan për nevojat dhe gjithçka me çfarë po përballen, veçanërisht para skadimit të ultimatumit të dhënë nga qeverisja e Kosovës për ata në veri të Kosovës, që i referohet konfiskimit të automobilave me targa të lëshuara në Serbi, të ashtuquajtura targa KM, prej të cilave janë rreth 9 mijë”, ka thënë Vuçiq.