Drejtoria për Hetimin e Trafikimit me Qenie Njerëzore (DHTQNj), ka hartuar dhe zbatuar planin operativ, me qëllim të identifikimit të fëmijëve lëmosh kërkues si viktima të mundshme të trafikimit.
Realizimi i planit ka zgjatur nga 24 deri më 28 tetor, që janë identifikuar afro 33 fëmijë lëmosh-kërkues, po ashtu edhe 27 lëmosh kërkues të rritur. Pra, numri i përgjithshëm i lëmosh-kërkuesve ka shkuar deri në 60 të tillë, thuhet në njoftimin e Policisë së Kosovës.
Policia e Kosovës ka bërë të ditur se nga ky plan ka arritur të inicojë 18 raste penale “Keqtrajtim apo braktisje e fëmijës”, ndaj 22 të dyshuarve.
Lëmosh kërkuesit ishin 21 shtetas të Kosovës, 12 shtetas të Shqipërisë, ndërsa prej të rriturve 16 janë nga Kosova dhe 11 nga Shqipëria.
Vlen të theksohet, se zbatimi i planit është shtrirë në gjithë territorin e vendit, që për realizimin e tij kanë qenë të përfshirë DHTQNj, njësi të ndryshme policore, prokuroria dhe Qendra për Punë Sociale.
Tutje, në njoftimin e Policisë është treguar se fëmijët lëmosh kërkues kanë qenë të shoqëruar nga familjarët e tyre dhe të pajisur me dokumente.
“Të gjithë fëmijët lëmosh kërkues kanë qenë të shoqëruar nga familjaret e tyre dhe të pajisur me dokumente. Në prani të punëtorit social, të gjithë fëmijëve u është plotësuar formulari me shënime dhe janë marrë në pyetje familjarët e tyre me qëllim të identifikimit të viktimave potenciale të trafikimit me njerëz”, thuhet në komunikatën e Policisë së Kosovës.