Zyrtarit të Ministrisë së Arsimit ia lanë në dorë një kërkesë. Kjo kërkesë që u dorëzua nga disa organizata studentore ishte për ministren e këtij dikasteri, të cilës iu kërkua të shpallë zgjedhjet e përgjithshme në Universitetin e Prishtinës.
Sipas këtyre studentëve, kjo është mënyra e vetme për ta shpëtuar UP-në.
“Konsiderojmë që kjo përbërje e Këshillit Drejtues është e jashtë ligjshme por edhe nuk është e dëshirueshme për Universitetin dhe nuk përfaqëson Universitetin ashtu siç duhet. Arsyeja tjetër pse i jemi drejtuar ministres me këtë kërkesë dhe jo Këshillit Drejtues është se ne nuk e njohim atë Këshill Drejtues sepse është zgjedhur në mënyrë të jashtë ligjshme. Presim që ministrja të reflektojë dhe të shpallë zgjedhjet e përgjithshme si rruga e vetme që ka mbetur për shpëtimin e UP-së, nga politizimi dhe nga grupet e interesit”, ka deklaruar Festim Tasholli nga Unioni i Studentëve.
Por, ministrja e Arsimit, Arbërie Nagavci që përveç mohimit për akuzat se ka pas ndërhyrje edhe përgjegjësinë për vendime ia hodhi Universitetit.
“Ajo është çështje e Universitetit dhe në kohën kur janë mbajtur zgjedhjet paraprake ne nuk kemi ndërhy në këtë proces dhe besoj që sapo të përmbyllet procesi i zgjedhjes së rektorit, Universiteti i merr vendimet në mënyrë autonome”, ka deklaruar Nagavci.
Por, ata që monitorojnë fushën e arsimit e thonë të kundërtën. Madje, marrin shembuj edhe nga vitet e kaluara.
“Zgjedhjet e përgjithshme mund të mbahen vetëm me vendim nga ana e Ministrisë së Arsimit dhe kjo është dëshmu si praktikë edhe vite më parë ku në vitin 2013 një muaj para zgjedhjeve Ministria pati vendosur për zgjedhje të përgjithshme”, ka deklaruar Rinor Qehaj, ekspert i Arsimit.
Rektori i Universitetit të Prishtinës u shkarkua në muajin tetor me arsyetimin për mospunë por organizatat monitoruese kanë akuzuar Ministrinë e Arsimit për ndërhyrje në këtë proces.