Socialdemokratët e udhëhequr nga kryeministrja aktuale daneze, Mette Frederiksen fituan shumicën e votave në zgjedhjet parlamentare të mbajtura të martën në Danimarkë.
Kështu Frederiksen-it iu dha mandati për të formuar një qeveri të re, pavarësisht kritikave për centralizimin e pushtetit dhe politikën e diskutueshme që ajo udhëhoqi gjatë pandemisë me Covid-19, raporton Reuters.
“Faleminderit të gjithë danezëve që na besuan votat e tyre, është një nder i madh. Edhe pse shumë dyshuan tek ne”, ka thënë Frederiksen.
Në një natë tejet të pasigurt paszgjedhore, rifitorja e bllokut të majtë, të kryesuar nga socialdemokratët, nuk ishte e sigurt deri në orët e para të mëngjesit.
Në mbledhjen e re të parlamentit, socialdemokratët do të jenë më të shumtët, pasi sipas rezultateve paraprake kanë fituar 27.5 për qind të votave.
Blloku i partive me prirje të majtë do të ketë 87 deputetë në parlamentin me 179 vende.
Ata gjithashtu fituan një vend në Ishujt Faroe dhe parashikohet të fitojnë dy vende të tjera në Greenland- një territor autonom danez i varur nga Danimarka që shpesh zgjedh kandidatët e krahut të majtë.
Nga partitë brenda “bllokut të kuq”, socialdemokratët e zonjës Frederiksen fituan gjithashtu dy vende dhe morën më shumë se një të katërtën e votave (27.5%), duke i bërë ato deri tani partinë më të madhe në Folketinget.