Katër kirurgë janë larguar nga Klinika e Kirurgjisë Abdominale në QKUK, në drejtim të sektorit privat, që nga viti i kaluar e deri më tani, ndërsa stafi mbështetës po largohen drejt vendeve perëndimore.
Këtë e ka bërë të ditur drejtori i Kirurgjisë Abdominale në QKUK, Ferat Sallahu, për Ekonomia Online.
Ai ka thënë se interesimi i mjekëve për ta lënë punën në QKUK është rritur, ndërsa thotë se Ministria e Shëndetësisë nuk po i plotëson këto vende.
“Nga viti i kaluar janë larguar nga klinika ime katër kirurgë, kanë gjetur vende që iu është shpërblyer më shumë puna, dhe realisht kanë gjetur kushte më të përshtatshme, kështu që në Klinikën time kemi jashtëzakonisht lëvizje të personelit të mesëm, sepse në kushtet që është një pagë minimale nuk mundet as nevojat elementare të i plotësojë në familje, kështu që institucionet shtetërore në vend që të kemi përkrahje, prapë po shohim se po anashkalohemi”, ka thënë Sallahu.
“Gjatë periudhës së pandemisë kemi pasur staf mbështetës, mirëpo me skadim të kontratës edhe atyre iu ka ndërprerë kontrata, kështu që jemi në hendikep të madh me personel. Në klinikën time kemi nevojë edhe për 18 deri në 22 personel të mesëm nevojitet, që të mundemi t’i kryejmë me sukses të gjitha shërbimet ndaj pacientit”, ka thënë tutje.
Ai ka thënë se sfidë në këtë Klinikë është edhe ikja e infermierëve, për të cilën, thotë se ndryshe nga mjekët, infermierët po largohen jashtë shtetit.