Kompania Kosovare për Distribuim me Energji Elektrike (KEDS) ka njoftuar se planet dhe aksionet për kontrolle të keqpërdorimeve të ekipeve të Departamentit të Humbjeve në këtë kompani, vazhdojnë të implementohen në tërë Kosovën në baza ditore.
Në një komunikatë për media, KEDS ka thënë se vetëm gjatë javës së kaluar, në të gjitha distriktet dhe nëndistriktet, janë kryer 1 mijë e 930 kontrolle të konsumatorëve të energjisë elektrike, për të cilët, dyshohej se po keqpërdornin rrymën.
Nga 1 mijë e 930 kontrolle të konsumatorëve, 156 prej tyre, janë vërtetuar se po e anashkalonin matjen e saktë të energjisë elektrike.
Mes tjerash, KEDS ka njoftuar se keqpërdorimi i energjisë elektrike është i papranueshëm dhe i dënueshëm. Rastet e tilla, ekipet e KEDS-it do t’i parashtrojnë për procedura të mëtutjeshme gjyqësore.