Ministria e Mbrojtjes e Republikës së Kosovës ka bërë të ditur se një plan bilateral në fushën e mbrojtjes për vitin 2023 ndërmjet Kosovës dhe Italisë, është nënshkruar.
Sipas postimit në Facebook, bëhet e ditur se të dyja palët u pajtuan që bashkëpunimi në të ardhmen të zgjerohet e të intensifikohet edhe më tej.
“Pas një pune të përbashkët në mes dy delegacioneve, në Shtabin e Përgjithshëm të Mbrojtjes së Republikës së Italisë, në Romë, u nënshkrua plani bilateral në fushën e Mbrojtjes në mes ministrive të Mbrojtjes së Kosovës dhe Italisë për vitin 2023”, thuhet në njoftim, gjersa theksohet se nënshkrimi i planit bilateral u bë nga drejtori i departamentit për Bashkëpunim Ndërkombëtar dhe Integrime Euroatlantike (DBNIE), kolonel Sylejman Cakaj dhe homologu i tij italian.
Plani në fjalë, do të përmbajë aktivitetet kryesore të fushës së mbrojtjes, të cilat pritet të realizohen në mes Forcave të Armatosura të Republikës së Italisë dhe Forcës së Sigurisë së Kosovës.