I akuzuari, Dardan Krivaqa ka thënë se tashmë e ndjera, Marigona Osmani e kishte pranuar se e kishte tradhtuar me djalin e dajës së tij.
Këtë deklarim, Krivaqa e bëri të mërkurën në Gjykatën Themelore të Ferizajt, aty ku ai së bashku me Arbër Sejdiu, po akuzohen për dhunimin dhe vrasjen e të ndjerës, Marigona Osmanit. Ndonëse një deklaratë e tillë u dha, e njëjta është kundërshtuar nga Endrit Puka, dëshmitar.
Ky i fundit ka thënë se ajo për çka po e akuzon Dardan Krivaqa nuk është aspak e vërtetë, raporton RTV Dukagjini.
Djali i dajës së Dardan Krivaqës ka dëshmuar për rreth 1 orë, duke treguar për raportet që i njëjti ka pasur me Krivaqën dhe me të ndjerën Marigona Osmani.
Gjatë kohës sa po dëshmonte ai është ballafaquar me Krivaqën, i cili e ka akuzuar se i njëjti ka kryer marrdhënie seksuale me të ndjerën dhe se i njëjti ka qenë disa herë në banesën e tyre, ndonëse dëshmitari ka thënë se prej se është martuar Krivaqa me Osmanin, asnjëherë nuk ka qenë në banesë të tyre, por janë takuar në qytet ose në shtëpinë e tij.
Dëshmitari ka mohuar të ketë pasur lidhje me të ndjerën, derisa ka treguar se gjatë kohës sa Krivaqa ka qenë në arrati, nëna e Krivaqës e kishte thirrur babin e tij në telefon dhe i kishte thënë se “Dardani e ka rrahur një grua, e do e rrahë edhe Endritin”.
Seanca e sotme është ndërprerë, për shkak te mungesës së dëshmitarëve të tjerë. E njëjta do vazhdojë nesër.
Ndonëse ishte paraparë të niste në orën 10:00, seanca gjyqësore nuk filloi me kohë për shkak të problemeve me energjinë elektrike.
Dardan Krivaqa e Arbër Sejdiu, të akuzuarit për dhunimin dhe vrasjen e 18-vjeçares nga Ferizaj, Marigona Osmani, nuk kanë pranuar fajësinë për veprat që ngarkohen nga Prokuroria Themelore në Ferizaj.
I akuzuari kryesor për dhunimin dhe vrasjen e 18-vjeçares, Dardan Krivaqa, kur është pyetur nga trupi gjykues se a e pranon fajësinë ka shprehur ngushëllime për familjen dhe ka thënë se i vjen keq, por ajo çka është e përshkruar në aktakuzë, sipas Krivaqës, nuk është e vërtetë dhe nuk ka ndodhur ashtu.
Për këtë rast deri më tash është mbajtur seanca fillestare.
Marigona Osmani është dhunuar seksualisht e fizikisht deri në vdekje gushtin e vitit të kaluar.
Vazhdon procesi gjyqësor ndaj Dardan Krivaqës dhe Arbër Sejdiut