Dy të dërguarit specialë për Ballkanin Perëndimor, Manuel Sarrazin nga Gjermania dhe Anzhej Frangesh nga Sllovenia, të enjten e 10 nëntorit kanë zhvilluar një takim me përfaqësuesit e Listës Serbe.
Kështu është bërë e ditur në një komunikatë nga Lista Serbe, ku thuhet se temë diskutimi ishte situata aktuale politike dhe e sigurisë në Kosovë.
“Dy emisarët specialë për Ballkanin Perëndimor, Manuel Sarrazin i Gjermanisë dhe Anzej Franges nga Sllovenia, janë takuar sot me zyrtarë të Listës Serbe. Siç ka njoftuar kjo parti, në takim ata u priten nga kryetari i kësaj partie Goran Rakiq dhe nënkryetari Igor Simiq”, thuhet në njoftim.
Takimi është mbajtur në zyrat e kësaj partie në Mitrovicë Veriore.
“Diskutuam në këtë takim situatën aktuale politike të sigurisë në Kosovë”, vijon njoftimi.
Aty morën pjesë edhe ambasadori i Gjermanisë dhe Sllovenisë në Kosovë.
Vendimit të Policisë në Veri të Mitrovicës, deputetëve të Listës Serbe, gjykatësve e prokurorëve serbë të cilët dorëzuan dorëheqjet e tyre, i janë bashkuar edhe zyrtarët e lartë të Komisioneve Komunale Zgjedhore.
Zëdhënësi i Komisionit Qendror të Zgjedhjeve në Kosovë, Valmir Elezi, në një përgjigje për Portalin Dukagjini, ka thënë se KQZ-ja e ka pranuar tashmë kërkesën për rekomandimin e emrave për plotësimin e vendeve të lira në Kuvendin e Kosovës.
“Konfirmoj se Komisioni Qendror i Zgjedhjeve ka pranuar kërkesën nga presidentja e Republikës së Kosovës për të rekomanduar emrat e personave të ligjshëm të radhës për të plotësuar vendet e lira në Kuvendin e Republikës së Kosovës”, ka thënë Elezi.
Sipas tij, rekomandimet do të përgatiten brenda afatit ligjor prej pesë ditësh.
Të shtunën e pesë nëntorit, përfaqësuesit e Listës Serbe kanë vendosur për bojkotimin e institucioneve të Kosovës.
Pos zyrtarëve policorë, punonjësve të gjykatave dhe institucioneve të tjera, dorëheqje kanë dhënë edhe kryetarët e komunave veriore dhe Goran Rakiq, nga pozita e ministrit për Komunitete dhe Kthim në Qeverinë e Kosovës.
Ky vendim është marrë pas një takimi të zhvilluar në mesditën e së shtunës në Zveçan.
Njoftimi vjen pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin e Qeverisë së Kosovës për riregjistrimin e makinave që kanë targa të lëshuara nga Serbia në RKS.