Ministri i Jashtëm i Ekuadorit, Juan Carlos Holguín, është shprehur se për arsye sigurie, është vendosur që shtetasve të 37 vendeve, përfshirë edhe Shqipërinë, t’u vendosen vizat.
Media ekuadoriane Primicias, raporton se kjo kërkesë është për t’i ndaluar “mafiozët e udhëhequr nga shqiptarët në vendet evropiane, si Belgjika dhe Holanda, si dhe në Ekuador, Kolumbi dhe Peru”.
Ai thekson se tashmë, për arsye sigurie, qytetarët e 37 shteteve, mes tyre edhe Shqipëria, kanë nevojë për viza për të hyrë në Ekuador, raporton Primicias.
Bashkëpunimi për çështjet e sigurisë dhe mbrojtjes, si dhe shkëmbimi i informacionit të inteligjencës, është rritur midis Ekuadorit, Britanisë së Madhe dhe Spanjës.
“Mafiat që veprojnë në Shqipëri dhe prej andej edhe në vende të tjera evropiane, veprojnë edhe nëpërmjet drejtuesve të ndryshëm të bandave dhe operatorëve nga burgjet e Ekuadorit, Kolumbisë dhe Perusë”, ka thënë ministri i Jashtëm i Ekuadorit, Juan Carlos Holguín.
Ministri i Jashtëm i Ekuadorit e ka konsideruar si vendim të gabuar heqjen e vizave për shtetasit shqiptarë, sipas tij kjo ka bërë që të rritet krimi në Ekuador.
“Në vendin tonë u vendosën delikuentë nga Shqipëria dhe, në fakt, mafia të caktuara nga Haiti dhe Afrika”, ka thënë ai.