Biznesmeni shqiptaro-amerikan Ramiz Tafilaj ka folur në emisionin Personale te Krrnare Vokshi për Lobin shqiptarë në Shtetet e Bashkuara të Amerikës.
Tafilaj ka thënë se meritat kryesore për këtë lob të suksesshëm i ka një biznesmen shqiptarë Xhim Xhema.
Sipas tij, shumë pak përmendet emri i njeriut që ka nisur këtë lob.
“Xhim Xhema i ka bërë lidhjet e para me senatorin Bob Dol. Edhe sot e kësaj dite, unë mendojë që Xhim Xhema është një person i rëndësishëm për situatën në Kosovë”.
Më tej, Tafilaj merita për këtë lob i ka atribuuar kongresmenit me prejardhje shqiptare nga Italia, Joe DioGuardi.
“DioGuardi na ka mësuar rrugët si me shkua në Kongres edhe Senat e Shtëpi të Bardhë. Ai kishte punuar si kongresmen edhe ai mundëte me na hapë këto rrugë”, ka theksuar Tafilaj.
Madje ai ka folur për sukseset e lobit shqiptar në Amerikë.
“Nënshkrimi i një rezolute të parë në vitet e ’88, ’89, i ka pasur vetëm shtatë kongresmen që e kanë nënshkruar për të mirën e Kosovës. Por, disa vite më vonë, ai ka arritur që t’i bëjë për mbi 170 kongresmen që kanë nënshkruar për rezolutën e Kosovës”, ka deklarua Tafilaj, teksa ka shtuar se “Ndoshta sot nuk mundet me i bë më 170 kongresmen që të nënshkruajnë për Kosovën, për shkak të një politike jo të mirë edhe strategjie jo të duhur por, fati ynë është sepse jemi një pik strategjike për SHBA-të”.