Ministrja e Punës dhe Politikës Sociale, Jovanka Trençevska ka thënë se e drejta për grevën e arsimit e cila po mbahet prej disa ditësh në Maqedoninë e Veriut, është e rregulluar me Ligjin për marrëdhënie të punës dhe marrëveshjet kolektive për mbrojtjen dhe edukimin e fëmijëve.
Ajo theksoi se punëdhënësi duhet t’i paguajë kontributet, por pagën neto të secilit të punësuar duhet ta paguajë Sindikata e Arsimit, Shkencës dhe Kulturës së Maqedonisë.
”Neni 240 jep të drejtën e grevës, dhe neni 241 i referohet faktit që sindikata duhet të paguajë rrogë. Kjo është një grevë për të kërkuar avancimin e të drejtave të punëtorëve. SASHK me vendimin për grevë kërkon harmonizim me pagën minimale, ndërsa ligji për pagën minimale ka afat prej gjashtë muajsh për harmonizim”, ka thënë Trençevska.
Ndër të tjerash, ajo ka deklaruar se nga punëtorët në çerdhe është kërkuar që të mbahet evidencë se kush janë në grevë, në mënyre që shteti të mund t’ua paguajë rrogat atyre që kanë shkuar në punë rregullisht, e të tjerët t’ia kërkojnë SASHK-ut.
Ndryshe, është dita e nëntë që nga fillimi i kësaj greve, pas kërkesës së SASHK-ut, për ngritjen e pagave për 18 për qind, të cilën e kishte refuzuar Qeveria, duke ofruar vetëm 10 për qind të mësimdhënësve.