Një punonjës në supermarketin “Walmart” në shtetin amerikan të Virxhinias ka vrarë gjashtë persona dhe ka plagosur katër të tjerë, thotë policia.
Oficerët u thirrën në vendngjarje pasi personi i armatosur, emri i të cilit nuk bëhet i ditur, hapi zjarr ndaj kolegëve në degën në Chesapeake. Më vonë ai e ktheu armën drejt vetes dhe vdiq nga një plagë e vetëshkaktuar me armë zjarri.
Ndonëse ende nuk dihet motivi, policia nuk është në kërkim të askujt tjetër në lidhje me sulmin, përcjell BBC.
Thirrja e parë e urgjencës u bë në orën 22:12 me orën lokale të së martës dhe oficerët arritën në supermarket brenda dy minutash. Ata hynë në ndërtesë pak më vonë dhe vendi i ngjarjes u deklarua i sigurt një orë më vonë pasi ishte pastruar dhe të gjitha viktimat ishin gjetur.
“Përpunimi i skenës së krimit ka të ngjarë të zgjasë disa ditë”, tha shefi i policisë Mark Solesky në një konferencë shtypi të mërkurën, duke shtuar se hetimi po kryhej me ndihmën e FBI-së.
Ai nuk e identifikoi sulmuesin, duke thënë se familja e tyre ende nuk ishte informuar.
Të shtënat vijnë vetëm disa ditë pasi një person i armatosur hapi zjarr në një klub nate LGBT në shtetin amerikan të Kolorados, duke vrarë pesë persona dhe duke plagosur 17 të tjerë.
Dhe në fillim të këtij muaji, tre lojtarë të futbollit amerikan u qëlluan dhe u vranë në Universitetin e Virxhinias.