Zëvendësministri i Ministrisë së Arsimit, Dukagjin Pupovci, këtë pozitë do ta mbajë vetëm deri në fund të vitit 2022.
Këtë e bëri të ditur për Portalin Dukagjini, derisa shtoi se arsyet janë personale dhe se dorëheqjen e tij ua komunikuar kryeministrit të Kosovës, Albin Kurti si dhe ministres së Arsimit, Arbërie Nagavci.
Pupovci, bëri të ditur se dorëheqjen formale nuk e ka paraqitur ende derisa t’i përfundoj disa punë që i ka filluar në MASHTI.
Ai theksoi se edhe pas largimit nga Ministria, do të jetë aktiv në fushën e arsimit.
“Është e vërtetë se kam planifikuar që deri në fund të vitit 2022 të tërhiqem nga posti i zëvendësministrit të MASHTI dhe këtë ja kam komunikuar Ministres Nagavci dhe Kryeministrit Kurti në tetor. Arsyet janë të natyrës personale. Për korrektësi, dorëheqjen formale nuk e kam paraqitur akoma, por këtë do ta bëj në kohën e duhur, kur t’i përfundoj edhe disa punë që i kam filluar dhe në koordinim me Ministren e Kryeministrin. Edhe pasi të jem larguar nga posti i tanishëm do të mbetem aktiv në fushën e arsimit”, ka deklaruar ai për Portalin Dukagjini.
Pupovci është profesor universitar dhe ekspert i arsimit tashmë e disa vite. Ai shkollën fillore dhe atë të mesme i mbaroi në Prishtinë.
Studimet e matematikës i përfundoi në Fakultetin e Shkencave Matematiko-Natyrore (FSHMN) të Universitetit të Prishtinës, kurse studimet pasuniversitare të magjistraturës në fushën e matematikës aplikative i përfundoi në Universitetin e Zagrebit, duke mbrojtur temën e magjistraturës me titull “Konvergjenca e metodave paralele për reduktimin e normës”.
Disertacionin e doktoratës me titull “Paralelizimi i disa metodave të tipit të Jakobit për zgjidhjen e problemit të vlerave vetjake” e mbrojti në FSHMN të Universitetit të Prishtinës.