Për presidenten e Kosovës, Vjosa Osmani, akti i Shpalljes së Pavarësisë së Shqipërisë dhe Dita e Flamurit, janë ndër ngjarjet më të rëndësishme në historinë e popullit shqiptar.
Në një postim në Facebook, Osmani ka thënë se që prej Gjergj Kastrioti- Skënderbeut, Ismajl Qemajlit, Hasan Prishtinës e Isa Boletinit, e deri te ish-presidenti historik Ibrahim Rugova dhe komandanti legjendar i UÇK-së, Adem Jashari – “një ëndërr dhe një ideal kishim”.
“E nderuar të jem sot në Vlorë krahas liderëve shtetërorë e institucionalë të Kosovës dhe Shqipërisë, për ta kremtuar këtë ditë të shenjtë për ne. Sot, Kosovë e Shqipëri, bashkërisht në Vlorë, kujtojmë në këtë 110-vjetor, gra e burra, të cilët e bën të mundshëm projektin e shteteve tona të pavarura. Siç e kemi bërë bashkërisht rrugën historike, bashkërisht do ta kemi rrugëtimin tonë për në familjen evropiane”, shkroi ajo.
Ndërkaq, kryeministri i Kosovës, Albin Kurti, me rastin e Festës së Flamurit, ka thënë se 28 Nëntori është pikënisja dhe pikëprerja e kombit shqiptar.
Me anë të një postimi në Facebook, kreu i qeverisë ka theksuar se në Vlorë, në 110-vjetorin e Shpalljes së Pavarësisë së Shqipërisë, kujtuan historinë, përkujtuan sakrificën dhe nderuan lavdinë e atyre që besuan sepse ëndërruan, punuan sepse besuan.
“Çdo vit, 28 Nëntori na bën bashkë. 28 Nëntori është pikënisja dhe pikëprerja e kombit tonë. E ne duhet të jemi më shpesh bashkë. Të punojmë bashkë. Të rrugëtojmë bashkë. Sepse duam. Sepse duhet”, ka shkruar Kurti.