Në mesin e shumë problemeve, të cilat, Hamide Magashi, i kishte denoncuar në hetuesi, dhe dosje të tjera të mbledhura nga organet ndjekëse, përmendet edhe fakti se e ndjera i kishte ofruar para bashkëshortit vetëm e vetëm që ta linte të qetë dhe për ta lejuar ndarjen.
Madje, ky fakt ishte përmendur edha para gjykatës.
Në një procesverbal, të cilin e ka siguruar KALLXO.com, përshkruhet se i dyshuari për vrasjen e Hamide Magashit, Sokol Halili, i kishte thënë gjykatësit që gruaja e tij i ka ofruar para për ta lejuar që të shkojë në shtëpi.
“Më ka premtuar një shumë të madhe të pareve, veç për ta lënë të shkojë te shtëpia e babës, më ka thënë martohu me kë të duash, vetëm më lërë rehat mua dhe fëmijën”- përshkruhet në procesverbalin gjyqësor.
Madje para gjyqtarit, i dyshuari kishte deklaruar se nuk do ta linte të lirë, Hamide Magashin, me asnjë kusht, pasi nuk do të lejonte që fëmijën ta mbante e ndjera. E gjithë kjo, ishte thënë para gjykatës në kohën kur po vendosej urdhëri mbrojtës.
Të gjitha këto deklarata i kishte bërë i dyshuari Sokol Halili, në kohën kur në Gjykatë po shqyrtohej kërkesa për mbrojtjen e viktimës.
Ndërkaq, deklaratat e viktimës para hetuesisë tregonin se ajo kishte raportuar dhunën e vazhdueshme, me të cilin, ishte përballur e ndjera.