Presidenti i Serbisë, Aleksandër Vuçiq, njoftoi mëngjesin e së premtes, se është takuar me ministrin e Mbrojtjes dhe me shefin e Shtabit të Përgjithshëm të ushtrisë serbe.
Ai nuk dha ndonjë detaj se për çfarë u diskutua.
“Gjatë natës deri në mëngjes me ministrin e Mbrojtjes, Millosh Vuçeviq dhe shefin e Shtabit të Përgjithshëm të Forcave të Armatosura, Millan Mojsilloviq. Nuk ka dorëzim”, shkroi Vuçiq në llogarinë e tij në Instagram.
Ndryshe, të enjten, shefi i Zyrës për Kosovën në Qeverinë e Serbisë, Petar Petkoviq, ka thënë se Serbia “do të shqyrtojë dërgimin e një mijë forcave të saj të sigurisë” në Kosovë.
Ndryshe, tre ditët e fundit, Mitrovica e Veriut ka qenë në tensione pas planifikimit të Qeverisë së Kosovës për mbajtjen e zgjedhjeve në këtë pjesë.
Të enjten e 8 dhjetorit, Policia e Kosovës ka njoftuar se një pjesëtar i saj ka mbetur i lënduar si pasojë e një sulmi nga persona të armatosur, të cilët kanë shtënë me armë të gjatë në drejtim të patrollës së policisë në fshatin Serbovc në Komunën e Zveçanit.
“Sot me datë 08.12.2022, rreth orës 23:00, në fshatin Serbovc, Komuna e Zveçanit, Njësitet policore deri sa kanë qenë në detyra të rregullta, në patrullim, janë sulmuar nga persona të armatosur me armë të gjata, nga një automjet i tipit Audi, ngjyrë hiri, me targa KM”, thuhet në komunikatën e Policisë së Kosovës në Facebook.
Ndërsa, të premten në mëngjes, një ekip i Kallxo.com është sulmuar në afërsi të Shkollës teknike në Mitrovicën e Veriut.
Sulmuesi ka goditur me grushte makinën, ndërsa mjete të forta janë hedhur edhe nga pjesëtarët e grupit. Nga ky sulm, gazetarët kanë arritur të shpëtojnë pa lëndime fizike.