Mesfushori nga Kosova, i cili përfaqëson Kombëtaren e Zvicrës, Granit Xhaka, ka reaguar në rrjetet sociale pas tre ditësh që nga eliminimi i skuadrës së tij nga Kupa e Botës “Katar 2022”.
Xhaka, nëpërmjet profilit të tij privat në rrjetin social, Instagram, i ka falënderuar të gjithë për mbështetjen që i kanë dhënë Zvicrës gjatë turneut në Katar.
Po ashtu, ai ka shtuar se me ekipin e tij do të rikthehen edhe më të fortë.
“Nganjëherë futbolli dhemb. Jam shumë i mërzitur që Botëror për ne përfundoi në këtë mënyrë. Por, dua t’ju falënderoj të gjithëve për përkrahjen e madhe gjatë turneut, që do të thoshte shumë për ne. Do të japim gjithçka nga vetja për t’u rikthyer më të fortë”, ka shkruar Xhaka.
Zvicra u eliminua në fazën e 1/8-tës, pasi u mposht nga Portugalia me rezultat të thellë 6-1.
Xhaka ishte kapiten i Zvicrës dhe i pazëvendësueshëm në katër ndeshjet e luajtura. Krahas Xhakës, pjesë e Zvicrës ishin edhe Xherdan Shaqiri e Ardon Jashari.
Kombëtarja e Zvicrës ndaj Portugalisë shënoi humbjen e dytë në katër ndeshje të luajtura, ku regjistroi edhe dy fitore.
Përfaqësuesja e Zvicrës, edhe në Katar arriti një fitore të paharrueshme, pasi mposhti përfaqësuesen serbe me rezultat 3 me 2.
Rezultatin e hapi Xherdan Shaqiri me golin e tij fantastik në minutën e 20-të. Shaqiri, është një nga tre lojtarët që ka shënuar në secilin prej tre turneve të fundit të Kupës së Botës – të tjerët janë Cristiano Ronaldo dhe Lionel Messi.