Anëtari i Partisë Demokratike të Kosovës në Komisionin Qendror të Zgjedhjeve, Arianit Elshani, ka thënë në mbledhjen e mbajtur të shtunën e 10 dhjetorit, se kanë dërguar një shkresë tek presidentja e Kosovës, Vjosa Osmani, por se e njëjta nuk ka fare të bëjë me shtyrjen e zgjedhjeve në komunat veriore.
Elshani, në mbledhjen e sotme të KQZ-së, ka thënë se në atë shkresë e kanë informuar presidenten për përgatitjen e mbajtjes së zgjedhjeve më 18 dhe 25 dhjetor në veri.
“Takimin e djeshëm e konsiderojë si konsultativ për të cilin mund të merret vendim, as nuk është votuar por ka qenë shprehje e vullnetit të anëtarëve se KQZ-ja nuk mund të rekomandojë shtyrjen e zgjedhjeve. Të bëhet publike shkresa e dërguar presidentes dhe të kuptohet se KQZ-ja vetëm ka informuar presidenten me mbarëvajtjen e përgatitjeve të zgjedhjeve”, ka theksuar ai.
Por, Elshani, mes tjerash, ka shtuar se nëpërmjet kësaj shkrese kërkuan nga presidentja Osmani garanci për sigurinë e votuesve.
“Në atë shkresë është specifikuar se KQZ-ja vazhdon me përgatitjen e zgjedhjeve dhe kërkon që të garantohet lëvizja e lirë e çdo qytetari dhe që bandat kriminale atje të kufizojnë lëvizjen e lirë të qytetarëve dhe të pengojnë qytetarët në shprehjen e vullnetit të tyre në ditën e zgjedhjeve. Prandaj, kërkojë që kjo shkresë të bëhet publike dhe të qartësohet edhe publiku”, u shpreh Elshani.
Ndër të tjera, Elshani tha se situata deri tani është e menaxhueshme dhe se përgatitjet janë duke vazhduar me rregull.