Presidenti i Serbisë, Aleksandër Vuçiq, ka thirrur mbledhjen e Këshillit të Sigurisë Kombëtare.
E njëjta është ftuar të mbahet të dielën e 11 dhjetorit në orën 19:0, raporton televizioni serb “RTS”.
Pas kësaj mbledhjeje, presidenti serb pritet të mbajë një konferencë për media.
Ndërkaq, kryetari i Listës Serbe, Goran Rakiq, ka thënë se kryeministri i Kosovës, Albin Kurti, “sot do ta dërgojë njësitin special të Policisë së Kosovës në barrikada”.
“Sipas informatave që kemi, Kurti në mbledhje të Këshillit të tyre të sigurisë, ka njoftuar se sonte do ta dërgojë ROSU-n e armatosur dhe njësitet e tjera policore në veri të Kosovës për të bërë ‘Olujën’. Ky është momenti ku përgjegjësia është e KFOR-it dhe EULEX-it, që të ndalojë kaosin që po përgatitë KFOR-i”, ka thënë ai.
Policia e Kosovës për Veriun: Një situatë e brishtë ka vazhduar edhe gjatë natës, e tillë vazhdon të jetë edhe sot
Policia theksoi se një situatë e brishtë ka vazhduar edhe gjatë natës, e tillë vazhdon të jetë edhe këtë të diel, andaj Policia e Kosovës sipas detyrës zyrtare po vazhdon fuqishëm angazhimet e saja me njësitet policore, në ofrim të sigurisë për të gjithë qytetarët pa dallime, në interes të ruajtjes së rendit dhe sigurisë publike, si dhe sjelljen para organeve të drejtësisë të personave të dyshuar të involvuar në veprimtari kriminale.
Policia e Kosovës, ka ftuar mediat dhe qytetarët që të mos bien pre e dezinformatave, thirrjeve apo provokimeve të mundshme nga persona apo grupe kriminale, por të bashkëpunojnë me Policinë e Kosovës e cila do të vazhdojë të angazhohet për ofrim të sigurisë ndaj të gjithë qytetarëve pa dallime, sjelljen para organeve të drejtësisë së personave të dyshuar, si dhe ruajtjen e rendit Kushtetues të Republikës së Kosovës.