Kryetari i Komunës së Deçanit, Bashkim Ramosaj, teksa është shprehur i indinjuar ka thënë se janë penalizuar me ndarjen buxhetore nga ana e Qeverisë së Kosovës.
Këtë, Ramosaj e ka quajtur diskriminuese, ngase nuk ka buxhet për projektet e reja që janë të nevojshme për komunën.
“Projektligji për buxhetin të cilin ende se ka marrë formën përfundimtare. Unë besoj që njëjtë si komuna e Deçanit edhe komuna tjera janë penalizuar me këtë ndarje buxhetore sepse sipas projektit të buxhetit parë ne si komunë e Deçanit nuk e kemi ndonjë buxhet të ri shtesë pos buxhetit prej vitit 2019 e tutje. Kurse nuk kemi buxhet për projekt të ri e që janë të nevojshme për komunën e Deçanit. Është pak diskriminuese në këtë raport. Shpresoj që obligimet që i ka Kosova si shtet duhet mi pas obligime shtetërore. Ajo çka është e mira për Deçanin dhe për këtë raport është me dërguar këtë proces deri në fund”, është shprehur ai për EO.
Buxheti për vitin e ardhshëm kap vlerën e 3.2 miliardë eurosh.
Komunat e Kosovës janë shprehur të pakënaqura për buxhetin e ndarë nga Qeveria.
Kryetari i Asociacionit të Komunave të Kosovës, Sazan Ibrahimi, kishte thënë se në bazë të analizës së tyre, mjetet e ndara kanë shënuar rënie ndër vite.
“Në bazë të analizave të Asociacionit të Komunave të Kosovës rezulton që në vitin 2020 komunat kanë pranuar 21.7% të mjeteve buxhetore nga buxheti i Kosovës. Në vitin 2021, 22.1%, kurse në vitin 2022 kjo përqindje bie në 19.6. Ndërsa në vitin 2023 do të jetë 20.5%”.
“Në raport me vitin 2021 dhe 2020 përqindja e mjeteve që do t’i bartet komunave është më e vogël se 2021”.
Sipas tij, kjo ndikon në përmasimin e jetës së qytetarit.
“Sa më shumë mjete që i dedikohen komunave atëherë edhe rezultatet shihen në praktikë dhe shkojnë në investime kapitale dhe përmirësohet jeta e qytetarit”, kishte thënë Ibrahimi.