Presidenti i Letonisë, Egils Levits të premten do të qëndrojë për vizitë zyrtare në Kosovë.
Presidentja e Kosovës , Vjosa Osmani e priti me ceremoni shtetërore, homologun e saj nga Letonia, Levits, në sheshin “Ibrahim Rugova” në Prishtinë, në orën 10:00.
Pas ceremonisë së pritjes, presidentja Osmani do të zhvillojë takim me homologun letonez si dhe pas takimit do të mbajnë një konferencë për media.
Egils Levits, në mesditë do të pritet edhe nga i pari i Kuvendit të Kosovës, Glauk Konjufca.
Për këtë vizitë zyrtare të presidentit letonez ka njoftuar edhe Policia e Kosovës.
Përgjatë kësaj vizite Policia e Kosovës ka deklaruar se do të kujdeset për ofrimin e sigurisë dhe mirëmbajtjen e rendit e qetësisë publike, gjatë kohës së lëvizjes së eskortës dhe qëndrimit të delegacionit shtetëror në Kosovë.
Me qëllim të qarkullimit të lirë të kësaj eskorte, Policia e Kosovës do të bëjë ndërprerje të përkohshme të qarkullimit të trafikut në intervale të shkurtra kohore të disa segmenteve rrugore.
Po ashtu, do të angazhohen zyrtarë policorë të njësiteve relevante për qarkullim sa më të lehtë të kësaj eskorte, andaj Policia e Kosovës ka kërkuar mirëkuptim të plotë nga ana e qytetarëve dhe pjesëmarrësve në trafik.