Sindikata e Pavarur e Administratës së Kosovës (SPAK) ka reaguar pas takimit të kryetarit të Bashkimit të Sindikatave të Pavarura të Kosovës, Atdhe Hykolli, me kryeministrin e Kosovës, Albin Kurti, ku thuhet se Hykolli e ka mbështetur Ligjin për Pagat dhe atë për Zyrtarët Publikë.
Përmes një komunikate për media të shtunën, SPAK-u ka thënë se është i shokuar dhe se distancohet nga qëndrimi i Hykollit. SPAK e ka quajtur atë qëndrim puro personal dhe jo qëndrim të BSPK-së.
“Pas raportimit nga mediat për takimin kryeministrin e Kosovës z. Kurti me kryetarin e BSPK z.Hykolli dhe mbështetjes se dhënë nga ky i fundit kryeministrit për miratimin e dy ligjeve atij për zyrtarë publikë dhe ligjit te pagave, SPAK -u është i shokuar dhe distancohet fuqishëm nga ky qëndrim i z.Hykolli, duke e konsideruar dhe konstatuar se ky qëndrim është puro personal i tij dhe assesi qëndrim i BSPK-së e as qëndrim i Kyesisë se BSPK-së, pasi Kryesia nuk është ftuar të diskutojë për këtë temë”, thuhet në reagimin e SPAK.
Sipas SPAK-ut, këto dy ligje, e me theks të veçantë ai për zyrtarët publikë, nuk i kundërshtuan vetëm sindikatat, por edhe faktori ndërkombëtar si BE-ja.
“Sa për dijeninë tuaj këto dy ligje e me theks te veçantë atë të zyrtarëve publikë nuk e kundërshtuan vetëm sindikatat, por të njëjtit u kundërshtuan ashpër edhe nga sektori i drejtësisë, organizatat ndërkombëtare që e suportojnë Republikën e Kosovës në fushën e legjislacionit, por gjatë ditës edhe vetë misioni i BE”, përfundohet në njoftimin e SPAK.