I dërguari i posaçëm i Mbretërisë së Bashkuar për Ballkanin Perëndimor, Lord Stuart Peach, të enjten e pesë janarit do ta vizitojë Kosovën.
Ai do të pritet nga kryeministri i Kosovës, Albin Kurti.
Kështu është bërë e ditur në njoftimin e zyrës së kryeministrit ku theksohet se takimi do të zhvillohet në orën 16:00.
“Kryeministri i Republikës së Kosovës, Albin Kurti, pret në takim Lord Stuart Peach, i Dërguar i Posaçëm i Mbretërisë së Bashkuar për Ballkanin Perëndimor”, thuhet në njoftim.
Këtë vizitë e kishte paralajmëruar edhe presidentja e Kosovës, Vjosa Osmani.
Ajo kishte potencuar se në pjesën e parë të janarit Kosovën do ta vizitojnë emisarët e SHBA-së, Gjermanisë dhe Francës.
“Po besoj që në pjesën e parë të janarit do të vijnë në Kosovë dhe po besoj që të gjitha këto shqetësime që i kemi, t’i sqarojnë. Emisarët e Gjermanisë dhe Francës, por që besoj që në atë takim do t’u bashkohet edhe emisari i ShBA-së, sepse për ne prezenca e Shteteve të Bashkuara është esenciale në këto takime”, kishte deklaruar Osmani.