Gjykata Themelore në Prishtinë, ka njoftuar se ka aprovuar kërkesën e Prokurorisë Themelore, që t’ia vazhdojë për dy muaj masën e paraburgimit personit me inicialet I.G., i cili dyshohet se vrau gruan e tij me sëpatë, në shtëpinë e tyre në rrugën “Mark Isaku”, më 25 nëntor të viti 2022, në Prishtinë.
Këtë për Dukagjinin, e ka konfirmuar zëdhënësja e Gjykatës Themelore në Prishtinë, Mirlinda Gashi.
Ajo ka thënë se i dyshuari do të qëndrojë në paraburgim deri më 25 shkurt të vitit 2023.
“Referuar kërkesës tuaj për informata, ju njoftojmë se pas kërkesës së Prokurorisë Themelore në Prishtinë, për vazhdimin e masës së paraburgimit në çështjen penale kundër të akuzuarit I.G, për veprën penale ‘Vrasje e rëndë’ nga neni 173 paragrafi 1 pika 1.3 dhe 1.4 të Kodit Penal të Republikës së Kosovës, Gjykata Themelore në Prishtinë – Departamenti për Krime të Rënda, ka aprovuar kërkesën e Prokurorisë Themelore të Prishtinës, dhe të pandehurit I.G ia ka vazhduar masën e paraburgimit në kohëzgjatje prej dy muaj, prej datës 25.12.2022 deri me datë 25.02.2023”, ka thënë Gashi për Dukagjinin.
Kujtojmë se, i dyshuari ishte vetëdorëzuar në Polici rreth orës 04:40 në ditën tragjike, ndërsa të nesërmen më 26 nëntor, ai ishte dërguar në paraburgim për 30 ditë.
“Sot, rreth orës 04:40, në Stacionin Policor Qendra, është paraqitur personi i lartcekur, i cili dyshohet se ka privuar nga jeta bashkëshorten e tij, tani të ndjerën S.G. (1959), me një mjet të mprehtë (sëpatë), në shtëpinë e tyre, në Rr. ‘Mark Isaku’ në Prishtinë”, thuhej në njoftimin e Prokurorisë.
Ndryshe, Gjykata Themelore në Prishtinë, kishte thënë se i pandehuri dyshohet për veprën penale “Vrasje e rëndë”.