Kryeministri i Kosovës, Albin Kurti, ka njoftuar se në Samitin e Investitorëve në Cyrih, Zvicër, i cili ishte i organizuar nga Qeveria e Kosovës, ka ftuar bizneset zvicerane që të investojnë në Kosovë.
Kryeministri Kurti ka thënë se më shumë se 60 ndërmarrësve nga fusha e infrastrukturës, energjisë, prodhimit e teknologjisë së informacionit, kanë prezantuar mundësitë që ofron Kosova për investitorët dhe investimet e huaja.
“Para më shumë se 60 ndërmarrësve nga fusha e infrastrukturës, energjisë, prodhimit dhe teknologjisë së informacionit, bashkë me delegacionin qeveritar, prezantuam mundësitë që ofron Republika e Kosovës për investitorët dhe investimet e huaja”, ka shkruar kreu i ekzekutivit.
Mes tjerash Kurti ka potencuar se kanë theksuar “përparimin e shënuar në dy vitet e fundit, sundimin e ligjit, stabilitetin institucional, politikat fiskale të zbatueshme në vend, planet investive të Qeverisë dhe fuqinë tonë punëtore të re dhe të talentuar”.