Lidhja Demokratike e Kosovës(LDK), përmes një komunikate për media, ka thënë se refuzimi i krijimit të Komisionit Hetimor Parlamentar për Energji, nga ana e Lëvizjes Vetëvendosje (VV), ‘nuk ka të bëjë me asgjë tjetër, përveç fshehjes së të vërtetës’.
Ndërkaq, nga kjo parti opozitare janë zotuar se do t’i shfrytëzojnë të gjitha rrugët juridike e politike për zbardhjen e kësaj të vërtete.
“Dhënia e 120 milionë eurove në energjetikë nga buxheti i shtetit dhe prapë shtrenjtimi i faturave të energjisë prej 100% për qytetarët, si dhe skandalet e fundit, shtrojnë nevojën emergjente për transparencë”, thuhet në njoftimin për media.
Ndryshe, nga tri partitë opozitare, Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës kanë deklaruar se nuk do të marrin pjesë në asnjë votim në Kuvendin e Kosovës, deri në formimin e Komisionit Hetimor Parlamentar për energjinë.
Duhet përkujtuar se, që pas refuzimit të VV-së për krijimin e Komisionit Hetimor Parlamentar, deputetët e LDK-së, PDK-së dhe AAK-së, kanë lëshuar sallën e Kuvendit të Kosovës.
Komisioni hetimor po kërkohet që të formohet për çështjet energjetike, saktësisht, për krizën energjetike, çështjet e tarifës dhe punësimet në KEK.
Gjithashtu, partitë opozitare kanë theksuar se derisa VV do të vazhdojë të refuzojë krijimin e Komisionit Hetimor, ata do të refuzojnë të jenë pjesë e votimeve në seanca parlamentare.