Mezzo-sopranoja Flaka Goranci, zëri shqiptar që po depërton në skenat e njohura evropiane, paralajmëroi projekte të reja pas këngëve të publikuara nga albumi ‘La Femme’.
Në një bisedë me Edita Doli, në emisionin “Radar” në Radio Dukagjini, Goranci tregoi se muzikën e këngës së publikuar së fundmi ‘The Speech of Love’, nga albumi ‘La Femme’, e ka shkruar vet ajo, si një dedikim për të gjithë njerëzit e kësaj bote.
Këngëtarja e operës, Flaka Goranci, këtë vit do të bëjë debutimin në rolin e MARIAa-s, një Opera Tango nga kompozitori legjendar Astor Piazzolla.
Në këtë bisedë, mezzo-sopranoja Flaka Goranci, ka folur edhe për vështirësitë që ka pasur në fillim të karrierës, por sot ndihet krenare që përfaqëson Kosovën nëpër botë.
“Unë kam filluar shumë e re në fushën e muzikës, fillimisht si pianiste më pas si këngëtare, për të vazhduar me paraqitje nga Kosova e Shqipëria nëper vendet evropiane dhe më gjerë. Ndihem shumë e lumtur që me paraqitjet e mia nëpër botë, prezantohem si mezzo-sopranoja, arstistja nga Kosova, pasi konsideroj se çdo artist është një lloj ambasadori për vendin e vet”, ka thënë Goranci.
Duke folur për zhvendosjen e saj nga Kosova për në Austri, artisja thotë se si synim ka pasur të studioj në Prishtinë, por që disa herë nuk është pranuar në Akademinë e Arteve.
“Qëllimi im nuk ka qenë të zhvendosem jashtë vendit, por që Akadamia e Arteve në Prishtinë nuk më pranoj për dy vitë në degën e solo këndimit. Vazhdova studimet në Shqipëri, nga Shqipëria në Tel Aviv dhe më pas në Austri, ku jam qe dhjetë vite. E them këtë për t’i dhënë leksion dikujt që mund t’a ketë rastin e njejtë. Duhet vetëm të vazhdohet ëndërra, sepse kur dëshira është e madhe edhe sukseset nuk do të mungojnë”, ka thënë Godanci, për Radio Dukagjini.
Mezzo-sopranoja Flaka Goranci, një këngëtare me suksese të mëdha në botë, e cila ka rikthyer në version tepër artistik, disa prej veprave më të mira të skenës së muzikës në Kosovë, është nënë e dy vajzave binjake dhe një grua e përkushtuar e familjes.