Ministria e Punëve të Jashtme ka njoftuar se përgjatë konsultimeve politike mes Ministrive të Punëve të Jashtme të Kosovës dhe Republikës së Maltës, Zëvendësministri i punëve të jashtme dhe diasporës, Kreshnik Ahmeti dhe Sekretari i Përhershëm i punëve të jashtme të Maltës, Christopher Cutajar kanë nënshkruar ripërtrirjen e Kornizës së Bashkëpunimit për vitet 2023-2028, të hënën e 30 janarit.
MPJ-ja njofton se ky dokument mundëson shkëmbimin e informacioneve relevante mes Ministrive të Punëve të Jashtme të të dyja vendeve, shkëmbimin e diplomatëve dhe trajnimin e tyre.
Po ashtu, ripërtëritja e Kornizës së Bashkëpunimit për vitet 2023-2028 mundëson dhe thellimin e bashkëpunimit në edukimin profesional, turizëm, kulturë, sport dhe mbrojtje civile, afrimin e komuniteteve të biznesit, me theks të veçantë të ICT, bashkëpunimin mes Universiteteve të të dyja vendeve, shkëmbimin e përvojave dhe trajnimin e stafit shëndetësor dhe shkëmbimin e përvojave dhe trajnimin e administratës publike për procesin e integrimit në Bashkimin Evropian.
“Zëvendësministri Ahmeti theksoi se diskutimet e thella në konsultimet e sotme politike dhe Korniza e nënshkruar janë shenja të marrëdhënieve të shkëlqyera mes të dyja vendeve dhe mundësive për thellimin e mëtutjeshëm të tyre”, njofton Ministria e Punëve të Jashtme.
Tutje thuhet se zëvendësministri Ahmeti ka falënderuar Republikën e Maltës për bashkëpunimin dhe mbështetjen e përhershme për Kosovën.