Oficerët doganorë kanë deklaruar se nga bastisja e dy lokacioneve në Kijevë dhe Lipjan, janë gjetur mallra pa dokumentacion të prejardhjes, rrjedhimisht të kontrabanduara nga Serbia.
Sipas njoftimit zyrtar, thuhet se njësitë e antikontrabandës së Doganës së Kosovës kanë ushtruar kontroll në këto dy lokacione, dhe me këtë rast, është hasur në mallra pa dokumentacion nga Serbia.
Në lokacionin e parë, thuhet se janë gjetur 550 litra vaj ushqimor me origjinë nga Serbia, ndërsa në lokacionin e dytë janë gjetur rreth 800 litra pije Coca-Cola me origjinë, po ashtu nga Serbia.
Oficerët doganorë deklaruan se mallrat janë sekuestruar dhe rastet janë të referuara në procedurë të kundërvajtjes.
“Dogana e Kosovës, në bashkëpunim me autoritetet kompetente, do të vazhdojë të ushtrojë kontrolla në kuadër të realizimit të detyrave dhe përgjegjësive të saj, me qëllimin e vetëm për parandalimin e veprimtarive ilegale në të gjithë territorin e Republikës së Kosovës” thuhet në njoftim, përcjell RTV Dukagjini.
Ndërkaq, Dogana e Kosovës ftoi të gjithë qytetarët që të njoftojnë për rastet e sjelljes joetike të zyrtarëve doganorë në numrin e telefonit 080050095.