Në Kuvendin e Serbisë, më 2 shkurt, do të mbahet seancë e posaçme parlamentare për Kosovën.
Në këtë seancë është ftuar edhe presidenti i Serbisë, Aleksandër Vuçiq.
Pritet që ai të flasë për rrjedhën e dialogut dhe propozimin franko-gjerman për zgjidhjen e kontestit ndërmjet Serbisë dhe Kosovës.
Çfarë është në rendin e ditës?
Deputetëve do t’u prezantohet raporti për procesin e negociatave me Kosovën në periudhën nga 1 shtatori i vitit 2022 deri më 15 janar të vitit 2023.
Raporti është dorëzuar në Kuvend nga Qeveria e Serbisë.
Në atë raport nuk përmendet propozimi franko-gjerman për zgjidhjen e kontestit ndërmjet Serbisë dhe Kosovës.
Çka është plani franko-gjerman?
Plani franko-gjerman tashmë është bërë propozim i Bashkimit Evropian për normalizimin e marrëdhënieve ndërmjet Serbisë dhe Kosovës. Ky dokument ka marrë mbështetjen edhe nga Shtetet e Bashkuara të Amerikës.
Ky plan nuk është bërë publik, por ai iu prezantua Beogradit dhe Prishtinës, në shtator dhe dhjetor të vitit 2022.
Në këtë dokument, në të cilin REL ka pasur qasje më herët, nuk përmendet në mënyrë eksplicite njohja reciproke apo anëtarësimi i Kosovës në Kombet e Bashkuara.
Por, në dokument përmendet mbështetja që palët duhet t’i japin njëra-tjetrës në procesin e integrimeve evropiane. Gjithashtu, Serbisë i kërkohet që të mos pengojë anëtarësimin e Kosovës në organizatat ndërkombëtare.