Qeveria e Kosovës e ka miratuar vendimin që një kontingjent i Forcës së Sigurisë së Kosovës të dërgohet në Turqi, për t’iu dalë në ndihmë rajoneve të prekura nga tërmeti.
Më tej, në vendimin e saj është thënë se “shteti dhe populli i Kosovës qëndrojnë pranë Turqisë dhe popullit të saj në këtë kohë të vështira”.
“Qeveria e Republikës së Kosovës përmes një mbledhje elektronike ka miratuar vendimin për dërgimin e kontingjentit të FSK-së, sipas kërkesës së Ministrisë së Mbrojtjes së Republikës së Turqisë, për ndihmë humanare në rajonet e prekura nga tërmeti i sotëm në Turqi”, thuhet në njoftimin e Qeverisë së Kosovës për media.
Ndërsa, presidentja e vendit, Vjosa Osmani, ka autorizuar dërgimin e Forcës së Sigurisë së Kosovës(FSK) në Turqi, për t’iu ndihmuar në tejkalimin e pasojave të tërmetit të kësaj të hëne.
“Presidentja e Republikës së Kosovës, Vjosa Osmani, në cilësinë e komandantes supreme, në pajtim me kompetencat saj kushtetuese, ka nënshkruar autorizimin për dërgimin e trupave të Forcës së Sigurisë së Kosovës në operacion ndërkombëtar humanitar në Republikën e Turqisë, për t’i mbështetur përpjekjet e autoriteteve turke për tejkalimin e pasojave tragjike të tërmeteve të sotme”, thuhet në njoftimin e Presidencës.
Gjatë kësaj të hëne, presidentja Osmani ka shprehur solidaritet të plotë me popullin turk dhe ka deklaruar se Republika e Kosovës do të vazhdojë ta ofrojë mbështetjen e nevojshme.