Ministrja e Drejtësisë, Albulena Haxhiu, është penguar nga deputetët e opozitës gjatë fjalimit të saj në Kuvendin e Kosovës.
Deputetët e opozitës e kanë bojkotuar fjalimin e Haxhiu, duke i goditur tavolinat, në momentin kur ajo ishte duke folur për rastin e ambasadorit të Kosovës në Kroaci, Martin Berishaj.
E gjithë kjo erdhi pas deklaratës së shefes së Grupit Parlamentar të Lëvizjes Vetëvendosje, Mimoza Kusari-Lila e cila e ka përmendur raportin e “Freedom House”, i cili përmend ish-presidentin Hashim Thaçi dhe kryetarin e AAK-së, Ramush Haradinaj.
Ajo ka thënë se kjo qeveri nuk ka deklaruar asgjë sa i përket raportit të Freedom House, i cili i përmend me emra kryetarin e AAK-së, Ramush Haradinaj dhe ish-presidentin, Hashim Thaçi, duke deklaruar edhe për lidhjet e tyre me krimin e organizuar dhe nivelin e lartë të korrupsionit.
Ndërsa, ministrja e Drejtësisë, Albulena Haxhiu ka thënë se do të zbardhet secila çështje.
“Pika e katër të rendit të ditës është edhe komisioni hetimor që është propozuar për menaxhimin e krizës energjetike, por edhe nisma e LVV-së që të hetohet që nga viti 2006 gjithçka çfarë ka ndodhur”, është shprehur ministrja.
“Jeni të shqetësuar e kuptoj, por në këtë vend nuk do të lihet asgjë për t’u zbardhur. Nuk lëvizi pa e kryer fjalën. Sa të qetësohet opozita do të vazhdoj”.
Ndërsa opozita ka vazhduar tutje goditjen e tavolinave.
Haxhiu: Berishaj do t’i përgjigjet secilës kërkesë të institucioneve