Të dielën e 12 shkurtit, në Akademinë e Kosovës për Siguri Publike në Vushtrri, është mbajtur testi me shkrim i kandidatëve për bashkëpunëtorë profesionalë.
Ky proces ka filluar me shpalljen e konkursit për procedurën e rekrutimit dhe përzgjedhjes së bashkëpunëtorëve profesionalë.
“Në kuadër të këtij procesi, rekrutues të dyzet (40) bashkëpunëtorëve profesionalë në gjykatat themelore morën pjesë 91 kandidatë, prej tyre 56 femra dhe 35 meshkuj”, njofton Këshilli Gjyqësor i Kosovës (KGjK).
KGjK-ja ka njoftuar se Kryetari i Komisionit për Rekrutim të Këshillit Gjyqësor të Kosovës, gjyqtari Ngadhnjim Arrni, ka mbikëqyrur mbarëvajtjen e testit me shkrim.
“Po ashtu, në kuadër të monitorimit dhe vëzhgimit të këtij procesi të rëndësishëm, morën pjesë përfaqësues nga Organizata për Siguri dhe Bashkëpunim në Evropë – OSBE”, thuhet tutje në njoftimin e KGjK-së.
Testi me shkrim për rekrutimin e bashkëpunëtorëve profesionalë është një nga fazat e testimit të përgjithshëm, i cili përbëhet edhe nga testi me shkrim dhe intervistimi i kandidatëve, të cilin Këshilli Gjyqësor i Kosovës e menaxhon sipas standardeve më të avancuara.