Profesori i shquar amerikan, dhe njohësi i çështjeve politike të Ballkanit, Daniel Serwer, ka thënë se themelimi i një Asociacioni të Komunave me shumicë serbe, me kompetenca ekzekutive brenda Kosovës, do të krijonte një “Republika Srpska”, të ngjashme me atë në Bosnjë dhe Hercegovinë.
“Kjo do të krijojë një tjetër ‘Republika Srpska’ de fakto. Republika Srpska e Bosnjës tani po përgatitet të refuzojë autoritetin e gjykatave të Sarajevës. Të njëjtën gjë mund ta presim edhe në Kosovë, nëse Asociacioni formohet me kompetencat ekzekutive që kërkon Beogradi”, ka thënë ai.
Profesori amerikan është shprehur se Serbia nuk është vend aleat i shteteve perëndimore dhe se ka një politikë të neutralitetit ushtarak.
“Serbia nuk është një vend aleat. Ajo nuk është anëtare e NATO-s apo një aleat i madh joNATO dhe ka një politikë të neutralitetit ushtarak. Ajo nuk i është bashkuar sanksioneve perëndimore kundër Rusisë për agresionin e saj kundër Ukrainës. Në fakt, Beogradi është kryesisht jashtë përafrimit me politikat e jashtme të BE-së që ka premtuar se do t’i respektojë”, ka thënë ai.
Tutje, ai ka shkruar se ShBA nuk është duke e bërë atë që po e kërkon Kosova, njohjen dhe anëtarësimin në Kombet e Bashkuara.