Ministri i Bujqësisë, Faton Peci, e ka konfirmuar se ka shkarkuar këshilltarin politik, Enis Osmani, pasi i njëjti është dënuar me një mijë e 500 euro gjobë, për falsifikim të rezultateve të votimit.
Ministri i këtij dikasteri, në një konferencë për media pas mbledhjes së Qeverisë, ka thënë se Osmani nuk do të jetë më pjesë e kabinetit të tij.
“Shumë shkurt, personi në fjalë nuk do të jetë pjesë e kabinetit prej muajit të ardhshëm”, ka thënë Peci.
Ndryshe, në 24 janar të vitit 2023, Enis Osmani është shpallur fajtor për “Falsifikim të rezultateve të votimit” të vitit 2017.
Prokuroria Themelore në Mitrovicë, më 7 shkurt 2022 pati ngritur aktakuzë kundër Enis Osmanit, me arsyetimin se më 11 qershor 2017, i pandehuri Enis Osmani në vendvotimin me numër 1115B/02D për Zgjedhjet e Parakohshme për Kuvendin e Kosovës, në cilësinë e kryesuesit të këtij vendvotimi, duke keqpërdor pozitën, detyrën apo autorizimet e tij lidhur me zgjedhjet, ka shtuar dhe hequr votat kandidatëve brenda subjekteve politike.