Nënkryetarja e PDK-së, Vlora Citaku, duke komentuar takimin e ditës në Bruksel të kryeministrit Albin Kurti dhe presidentit serb, Aleksandër Vuçiq, ka thënë se sot merr fund kauza e fundit e Kurtit, me të cilin, u ngrit.
Sipas saj, Kurti do të nënshkruajë zbatimin e Asociacionit të Komunave me shumicë serbe.
“Sot merr fund kauza e fundit, me të cilën, kryeministri Kurti u ngrit, dhe për të cilën, ai dikur i shpallte të tjerët tradhtarë e patriotë. Sot, kryeministri e nënshkruan zotimin për zbatimin e Asociacionit”, ka shkruar Çitaku.
“Njeriu i cili thoshte se presionit i nënshtrohen vetëm të shantazhuarit, sot nënshkruan marrëveshjen, për të cilën, ai dhe subjekti i tij e kanë sulmuar Kuvendin, kanë hedhur gaz lotsjellës. Kaq për kauzat e Kryeministrit”, ka shtuar ajo.