Ish-zëvendësministri i Punëve të Jashtme, Anton Berisha, ka komentuar takimin e kryeministrin Albin Kurti në Bruksel me presidentin e Serbisë, Aleksandër Vuçiq, ku tema e bisedimeve është plani evropian për normalizimin e marrëdhënieve mes dy vendeve.
Sipas Berishës, nëse Kurti nuk e nënshkruan sot marrëveshjen, atëherë do të dalë joserioz para bashkësisë ndërkombëtare.
“Në qoftë se Albin Kurti nuk nënshkruan sot marrëveshjen, atëherë do të dalë joserioz në raport me bashkësinë ndërkombëtare, marrë parasysh faktin se teksti i sotëm nuk ‘ka pikur nga qielli’, por është negociuar me kohë dhe vetë Kurti, sipas zyrtarëve evropianë, ka dhënë pëlqimin”, ka shkruar Berisha, duke shtuar se nëse e nënshkruan, atëherë do të dalë joserioz ndaj bashkësisë vendore.
“Në qoftë se Albin Kurti nënshkruan sot marrëveshjen, atëherë do të dalë joserioz ndaj bashkësisë vendore, ngase shqiptarëve në dekada u ka premtuar që nuk do t’i nënshtrohet trysnisë ndërkombëtare dhe gjithë politika e ardhjes se tij në pushtet është bazuar në kundërshtimin e dialogut me Serbinë si dhe me sloganin ‘Zajednica’”, ka shtuar Berisha.
Sipas tij, në një shtet e shoqëri normale, dita e sotme në të dy variantet do te ishte fundi i jetës politike të Kurtit.
“Kosova është përtej interesave të cilitdo individë dhe kjo duhet të jetë përcaktimi ynë kryesor”.