Kryeministri i Kosovës, Albin Kurti, ka përsëritur qëndrimin e tij edhe gjatë seancës së natës në orët e para të së premtes, se “Zajednica nuk kalon”.
Deklarata e tij erdhi pasi deputetët e opozitës ia përmendën në fillim të kësaj seance, pak ditë kur edhe Kosova u pajtua për përmbajtjen e planit evropian, e ku pjesë e këssj marrveshje të akorduar mes Kosovës dhe Serbisë është edhe AKS dhe eksteritorialiteti i Kishes Ortodokse Serbe në Kosovë.
Sipas opozitarëve, Kurti tashmë ka ndërruar qëndrimet dhe e ka pranuar formimin e Asociacionit të Komunave me shumicë serbe, por kryeministri ka thënë se edhe pse ka kaluar në Kuvendin e Kosovës, “’Zajednica’ nuk kalon në Kryeministri e Qeveri”.
“Për ta përmbyllur këtë çështjen e Asociacionit apo Zajdenicës, ‘Zajednica’ ka kaluar këtu në Kuvend. ‘Zajednica’ nuk kalon. Nuk ka kaluar në Gjykatë. Nuk ka kaluar në popull. ‘Zajednica’ nuk kalon as në Kryeminstri e as në Qeveri. Por, këtu te ju po”, është shprehur Kurti.
Po ashtu, ai para deputetëve ka thënë se pikërisht çështja e formimit të Asociacionit është më e kërkuara nga ana e Serbisë në dialog.
“Kur takohem me presidentin e Serbisë në Bruksel, ai thotë vetëm ‘Zajednica’ dhe asgjë tjetër”, ka deklaruar Kurti.
Deputetët e opozitës kanë akuzuar kryeministrin Albin Kurti se me pranimin e planit evropian për dialogun Kosovë-Serbi, ka hequr dorë nga premtimet që ka bërë në të kaluarën.
Ndërsa, deputetët e Vetëvendosjes i kanë dalë në mbrojtje kryeministrit pas akuzave të opozitës.
Deputeti Dimal Basha ka thënë se opozita është pa qëndrim, pasi sipas tij, partitë opozitare “nuk dihet se çfarë qëndrimi kanë”.