Flamuri shqiptar është ulur në gjysmështizë, të dielën e pesë marsit, në nderim të viktimave që humbën jetën si pasojë e aksidentit tragjik në Greqi, ku në mesin e viktimave ishin katër shqiptarë.
Kështu bëri të ditur, kryeministri i Shqipërisë, Edi Rama, përmes një fotografie të shpërndarë në rrjetin e tij social, Facebook.
Qeveria shqiptare ka shpallur ditë zie kombëtare ditën e diel, më pesë mars. Për të nderuar viktimat e këtij aksidenti tragjik, në të gjitha institucionet shtetërore dhe publike në Shqipëri, flamujt do të ulen në gjysmështizë.
Katër prej viktimave të aksidentit mes dy trenave që ndodhi më 1 mars në Greqi janë shqiptarë. Kjo u bë e ditur nga Ministria për Evropën dhe Punët e Jashtme në Shqipëri, pas komunikimit me autoritetet greke.
“Në radhët e viktimave të aksidentit tragjik hekurudhor në Larisa konfirmohen deri më tani katër shtetas shqiptarë dhe me origjinë shqiptare. Ata janë: Ifigjenia Micka, Pavlin Bozo, Joanis Xhollas, Klaudia Lato”, kishte deklaruar Ministria e Jashtme.
Po ashtu, ata bënë të ditur se po presin rezultatet e ADN-së edhe për një shtetas tjetër shqiptar që është deklaruar i zhdukur nga familjarët e tij dhe policia greke.
Nga përplasja e dy trenave kanë vdekur të paktën 57 persona dhe janë lënduar dhjetëra të tjerë.
Në mesin e të lënduarve janë edhe tetë shtetas shqiptarë, dy prej të cilëve në gjendje të rëndë.
Ata po marrin trajtim të specializuar mjekësor në spitalin e Larisës në Greqi.
Në Greqi po vijojnë ende operacionet e shpëtimit dhe pritet identifikimi edhe i një personi tjetër.
Ky aksident, për të cilin Qeveria ia ka lënë fajin gabimit njerëzor, ka nxitur zemërim dhe protesta në Greqi.
Ministri grek i Transportit dha dorëheqje pas përplasjes së trenave, ndërsa në vend është hapur një debat i madh mbi sigurinë në transportin hekurudhor.