Gjashtë shqiptarë kanë vdekur si pasojë e aksidentit në mes të dy trenave që ndodhi të mërkurën në afërsi të Larissas, në Greqi.
Ministrja e Jashtme e Shqipërisë, Olta Xhaçka, i ka publikuar emrat e viktimave në Facebook.
“Ngushëllimet më të sinqerta familjarëve të viktimave të aksidentit tragjik hekurudhor në Greqi. Kaq shumë jetë të prera në mes kaq papritur e në mënyrë kaq tragjike! Në këtë ditë zije një lutje e veçantë shkon për familjarët e 6 bashkëkombësve tanë që humbën jetën në këtë aksident: Klaudia Lato, Ifigjenia Micka, Erieta Molko, Ioanis Xhiollas, Denis Ruçi, Pavlin Bozo”, ka shkruar ajo.
Flamuri shqiptar është ulur në gjysmështizë, të dielën e pesë marsit, në nderim të viktimave që humbën jetën si pasojë e aksidentit tragjik në Greqi.
Kështu bëri të ditur, kryeministri i Shqipërisë, Edi Rama, përmes një fotografie të shpërndarë në rrjetin e tij social Facebook.
Qeveria shqiptare ka shpallur ditë zie kombëtare ditën e diel, më pesë mars. Për të nderuar viktimat e këtij aksidenti tragjik, në të gjitha institucionet shtetërore dhe publike në Shqipëri, flamujt do të ulen në gjysmështizë.
Nga përplasja e dy trenave kanë vdekur të paktën 57 persona dhe janë lënduar dhjetëra të tjerë.
Në mesin e të lënduarve janë edhe tetë shtetas shqiptarë, dy prej të cilëve në gjendje të rëndë.
Ata po marrin trajtim të specializuar mjekësor në spitalin e Larisës në Greqi.
Në Greqi po vijojnë ende operacionet e shpëtimit dhe pritet identifikimi edhe i një personi tjetër.
Ky aksident, për të cilin Qeveria ia ka lënë fajin gabimit njerëzor, ka nxitur zemërim dhe protesta në Greqi.
Ministri grek i Transportit dha dorëheqje pas përplasjes së trenave, ndërsa në vend është hapur një debat i madh mbi sigurinë në transportin hekurudhor.