Vepra dhe jeta e Gjergj Kastriot Skënderbeut ka thyer barriera përtej trojeve shqiptare, si historike, ashtu edhe kulturore. Rëndom për figura të mëdha si Skënderbeu, frymëzojnë e ndikojnë në jetët e njerëzve edhe pas vdekjes.
Te populli shqiptar, Skënderbeu u bë figurë unifikuese e po ashtu simbol rezistence për qindra e qindra vjet deri në ditët e sotme.
Ishin rilindësit shqiptarë ata të cilët e sollën përsëri në jetë atë, edhe pse ai kishte kohë që kishte vdekur. Skënderbeu u bë përsëri i gjallë, përmes librave, këngëve duke u shndërruar në simbol të pavdekësisë e sinonim të rezistencës.
Për të shkroi, Marin Barleti, Naim Frashëri, Sami Frashëri, Fan Noli, Lasgush Poradeci e Ismail Kadare, por edhe shumë autorë të tjerë, të cilët herë e mitizuan, herë treguan histori, herë letërsi, për ta sjellë figurën e tij në të gjitha format e mundshme.
Por, për heroin shqiptar nuk u shkrua vetëm nga shqiptarët, për të kanë shkruar shumë autorë të huaj, për shkak se ndikimi i tij shkonte përtej Shqipërisë e shqiptarëve, ai ishte figurë universale, e rezistencës dhe luftës për popullin e tij dhe jo vetëm.
Së fundmi, studiuesi shqiptar, Bejtullah Destani, i cili ka bërë shumë zbulime të rëndësishme në arkivat dhe bibliotekat britanike, tashmë ka zbuluar një dokument të vjetër në gjuhën spanjishte të vjetër, të quajtur: Escanderbeg – Comedia burlesca” me autor De D. Felipe Lopez.
Komedia për Skënderbeun është e panjohur për lexuesit shqiptarë, andaj RTV Dukagjini e sjell për herë të parë në origjinal.
Shiko këtu komedinë e plotë, dhe këtu katalogun për komedinë.
Kjo vepër siç shihet është e shkruar në vargje dhe jo në prozë. Në kohën antike dhe në mesjetë gati se të gjitha zhanret letrare shkruheshin në vargje, si tragjeditë, epet, dramat, komeditë e kështu me radhë.
Edhe komedia në fjalë e zbuluar në Bibliotekën Kombëtare të Spanjës, që besohet të jetë shumë e vjetër, është e shkruar në vargje.
Deri më tani, nuk ka pasur ndonjë informatë për ekzistimin e kësaj vepre, përkatësisht komedie, prandaj do të ishte me rëndësi që të përkthehej në mënyrë që lexuesi e studiuesi shqiptar të kishte qasje në përmbajtjen e librit.
Gjithashtu, Destani ditë më parë kishte gjetur një dokument të paparë më parë, i cili ka të bëjë me gjenealogjinë e familjes së Skënderbeut, të zbuluar në Akademinë Spanjolle.