Ministrja e Arsimit, Arbërie Nagavci ka njoftuar se me kryeministrin Kurti kanë vendosur gurthemelin e shkollës fillore dhe të mesme të ulët “Fan Noli” në Kamenicë.
“Projekti i kësaj shkolle përfshin një sipërfaqe prej 5,088.63 m², dhe vlera e objektit është 1,694.452.62 euro. Ndërtimi i shkollës pritet të përfundojë brenda 36 muajve”, njofton Nagavci.
Ministrja Nagavci ka thënë se është simbolik fakti që pikërisht nisja e punimeve të shkollës “Fan Noli” përkon me shënimin e ditës së humbjes së “këtij Rilindasi të shquar”.
“Është krenari që kjo shkollë mban emrin e tij, dhe njëkohësisht na forcon besimin se këto nxënëse e nxënës do të japin kontribut po aq të çmuar për vendin”, ka shtuar Nagavci.
Nagavci ka theksuar se infrastruktura arsimore është parakusht për zhvillimin e ambienteve miqësore për fëmijët, dhe i kontribuon mësimdhënies së avancuar.